Eguenean, herrian euskarak duen erabileraren inguruko hitzaldia. Atzo, Musika Eskolakoen eta Bandaren emanaldiak eta Mintzodromoa. Eta gaur, Euskaraldiaren Herri Egunaren baitan, frontenis txapelketa, herri bazkaria eta musika emanaldiak. Hizkuntza ohiturak aldatu gura dituen ariketa sozialaren hirugarren edizioak indartsu hasi da Eskoriatzan.
“Ondo hasi dugu Euskaraldia. Apur bat denetik antolatu dugu, ahalik eta askotariko jendearengana heldu asmoz”, azaldu dute herri bazkarian Euskaraldiko batzordeko gazteen taldeko Ane Arrietak eta Dorleta Ezeizak.
Goizean egindako frontenis txapelketan Ander Errarte eta Hector Rodriguez izan dira irabazle Iñaki Astiazarani eta Aitor Fernandez de Arroiaberi irabazi ostean. Gero Fernando Eskoriatza plazan egindako bazkarian, bestalde, 70 lagun pasatxo elkartu dira. “Egia da eguraldiak ez duela batere lagundu, lurra bustita dagolako eta fresko egiten duelako. Baina karpa beteta dago eta horrek giro goxoa sortu du. Pozik gaude”, azaldu dute Arrietak eta Ezeizak. Musikak girotu du bazkalostea.
