"Etxean ditugun gauzei bigarren aukera bat ematea eta haien bizitza baliagarria luzatzen laguntzea da helburua", adierazi dute Eskoriatzako Udaletik, eta, zapatuan salgai jarriko diren gaietako batzuk honako hauek dira: arropa, liburuak, diskoak, jostailuak, etxeko tresnak…
Eskoriatzako Udalak doan utziko dizkie parte-hartzaileei postuetarako mahaiak, baina interesa duten pertsonek aldez aurretik izena eman beharko dute udaleko H@ZI zerbitzuan edo 943 71 44 07 telefono zenbakira deituta.
Postu solidarioa
Aurtengo bigarren eskuko azoka berezia izango da. Izan ere, Garagune elkarteko kideek postu bat jarriko dute, eta bertan birziklatutako materialekin eurak egindako hainbat gauza salduko dituzte. Garagune irabazi-asmorik gabeko elkarte pribatua da, Gipuzkoan zehar hainbat zentro dituzte, eta desgaitasun intelektuala duten helduei eguneko arreta eskaintzen die.
Azokarekin batera, antzerkia
Bigarren eskuko azokarekin batera, eta 13:00etan kale antzerkia izango da Fernando Eskoriatza plazan. Zirko Txoskok Oh-Pera antzezlana aurkeztuko du antzerkia, umorea eta zirkuaren arteko nahasketa bat eskainiz.
