Domekan, urriaren 2an, 65 urtetik gorako jubilatuek omenaldia jasoko dute Eskoriatzako Udalaren partetik. Ohiko ohiturari eutsiz, San Pedro parrokian egingo den mezara joango dira herriko nagusiak, eta, ondoren, salda beroa izango da jubilatuen tabernara joaten den pertsona ororentzat. Gero, bazkaria izango dute Manuel Muñoz kiroldegian, eta, urtero moduan, opari banaketa egingo dute. Amaitzeko, musika jarri eta dantzarako tartea hartuko dute.
150 lagun bazkaltzeko
"Aurten, lehenengoz egingo dugu jubilatuen omenaldiko bazkaria Manuel Muñoz kiroldegian. Normalean, Joseba Iñurrategi pilotalekuan egin izan dugu, baina aurten, lekualdatzea erabaki dute antolatzaileek. Leku aldaketa egin arren, guztira, 150 lagun batuko gara bazkaltzeko. Menu itxia da jarriko digutena, eta bapo jango dugula aurreikusten dugu. Gero, bertan banatuko ditugu opariak erretiratuen artean, eta horiek Eskoriatzako komertzioek eta Olazar Erretiratuen Elkartekoek eskainitakoak izango dira. Beste behin, ez dute hutsik egingo Eskoriatzako udal ordezkariek herriko nagusienei eskainitako oroigarriek", adierazi du Olazar Erretiratuen Elkarteko kideak.
Nagusienen erreleboa
Azken urteetan, egun horretan omendu izan dituzten Eskoriatzako erretiratu nagusienak Elena San Vicente eta Pablo Gamboa izan dira. Hala ere, Olazar Erretiratuen Elkartekoek adierazi dutenez, aurten, San Vicente ez da bazkarira joango. Gamboa, berriz, 2021eko abuztuaren 25ean hil zen, 103 urte zituela; beraz, bazkarira joango diren gainontzeko pertsonen artean, emakume nagusienak eta gizonezko nagusienak jasoko dituzte oroigarriak; batek lore-sorta eta besteak, txapela.
Manifestuaren irakurketa
Urriaren 1ean Pertsona Nagusien Nazioarteko Eguna izanda, urriaren 2ko hitzorduan bazkalostea aprobetxatuko dute Olazar Erretiratuen Elkartekoek manifestu bat irakurtzeko. "Agijupens Gipuzkoako Erretiratu eta Pentsiodunen Elkarteak atera duen manifestu bera irakurriko dugu".