2020an hil zen Juan Carlos Zubia eskoriatzarra, eta hura omentzeko hamar minutuko ikuskizuna izango da uztailaren 30ean. Pasioz bizi zituen etxafuego, su artifizial eta musika emanaldiak, eta herriko zenbait ekitalditan horien ardura izaten zuen. Hura izan zen, gainera, San Inazio bezperan musika eta suzko erruberak konbinatutako ikuskizunaren ardura izaten zuena. Hori horrela, Vulcano pirotekniakoek zuzenduta izango da ikuskizuna gozagarri.
Ekainaren hasieran eman zuen ekintzaren berri, Vulcano pirotekniakoak herrian izan zirela aprobetxatuta, eta bertan, ikuskizunaren xehetasunak emateaz batera, Zubia izan zuten gogoan: "Hizki handiz idatzi nahi dugu esker ona; alde batetik, Juan Carlos Zubia omendu nahi dugu; eta, bestetik, Vulcano pirotekniakoen ezinbesteko laguntza eskertu nahi dugu. Zubia kolaboratzaile sutsua zen; gure herriko ospakizun, jai eta ekintzak hura gabe ulertezinak zirelako. Beti zegoen laguntzeko prest, eta, zer esanik ez, etxafuegoak jaurtitzeko. Beste gauza askoren artean, hari esker, San Inazio bezperako ikuskizun piromusikala antolatu ahal izan genuen, eta aurten ere egun berean antolatzea erabaki dugu", adierazi zuen Joserra Zubizarretak, Eskoriatzako alkateak.
Errautsak piroteknian
Juan Carlos Zubiaren seme Haritz ere hitzorduaren aurkezpenean izan zen, eta eskerrak emateko aprobetxatu zuen: "Nire aita Eskoriatzako udaletxean jaiotakoa zen, eta beti izan zuen inklinazio bat bertako ekintzetan parte hartzeko. Familian haren errautsekin zer egin eta zer ez erabakitzerakoan, beraren errautsen zati bat su artifizialen karkasetan sartzea erabaki dugu…".
Merkatuko onena
Vulcano pirotekniako arduradunek, bestalde, honako hau aurreratu zuten ikuskizun piromusikalaren gainean: "Ikuskizuna Juan Carlosek bere garaian egin behar zuen bilduman oinarritukoa da, era oso profesionalean. Ikuskizun oso dinamikoa izango da eta herritarrek pirotekniako merkatuko azken berrikuntzekin gozatzeko aukera izango dute". [Hona hemen Vulcano pirotekniakoek prestatutako planoa]