Bero sapa izan da aste honetan, eta asteburuaz gain, datorren asteko egunetarako ere hala iragarrita dago: tenperatura altuak izatea eta ia 40 gradura iristea. Gainera, Euskal Meteorologia Agentziak bina abisu hori ezarri ditu asteon, eguazten eta eguenerako. Hori horrela, Santa Marina plazan ur-lanbroa botatzen duen sistema jarri zuten atzo arratsaldean, eta,egubakoitzera arte, nahi izan duen orok freskatzeko eta jolasteko aukera izan du.
Ur-lanbroa botatzen duen sistema hau ez da berria, kioskotik farol batera dago lotuta, eta, duela zenbait urte jarri zuten moduan, berreskuratzea erabaki du Eskoriatzako Udalak.
Agian, datorren astean
Eguaztenean zabaldu zuten ur-lanbroa botatzen duen sistema, Santa Marina plazako kioskoan, eta sistema bera gaur ere izango da martxan. Eta, bihar, ere jarriko dute, 17:30etik 19:30era bitartean, gainontzeko egunetan moduan. Hori horrela, hiru egun hauetan izaten duen harreraren eta esperientziaren arabera, ur-sistema erabiltzen jarraitzea baloratu egingo du Eskoriatzako Udalak, eta, egoki ikusten bada, datorren asterako funtzionamendu-ordutegia ezarriko da.
Herritarrak animatu
Beroari aurre egin nahi dion edozeinek izango du freskatzera joateko aukera, eta, Eskoriatzako Udaletik adierazi dutenez, toallak eta aldatzeko arropa hartuta, Santa Marina plazara joatera animatzen ditu herritarrak.
