'Go!azen' telesailekoak Gorosarrin izango dira San Pedro egunean

Imanol Beloki Unamuno 2022ko eka. 25a, 17:14
Go!azeneko Aitziber Errazkin Enara, Ander Lacalle Luken eta Asier Burguete Markel.

Eskoriatzako San Pedro jaietako programazioan ekintza ugari izango dira haurrei zuzenduta: marrazki lehiaketa, kuadrillen arteko jokoak, entzierro txikia eta barrakak, besteak beste. Hala ere, San Pedro egunean, 18:00etan, Gorosarri plazan, jaietako programazioan dagoen eta haurrentzat zuzendutakoa den hitzordu azpimarragarriena izango da. Izan ere, Pausoka eta Glu Glu Produkzioak konpainiek egindako Go!azen karaokea musika ikuskizun berria aurkeztuko dute ETB1eko Go!azen telesaileko zenbait protagonistek.

5 eta 16 urte bitarteko haurrei zuzendutako ikuskizuna izango da, ordubete inguru iraungo du, eta, telesaileko hainbat aktoreren parte-hartzearekin eta artista gonbidatuen laguntzarekin, denboraldi honetako abestiak abesteko karaoke irekia eskainiko dute.

Ikuskizun parte-hartzailea

Maiatzaren 29an estreinatu zuten ikuskizun berri hau, Go!azen karaokea, eta bertaratzen direnek dantzekin eta kantuekin gozatzeko aukera izango dute Gorosarri plazan. Go!azen karaokea ikuskizunean, Aitziber Errazkin Enara, Ander Lacalle Luken eta Asier Burguete Markel aktoreek gidatuta, telesaileko zenbait abesti kantatzeko aukera izango dute jarraitzaileek: batzuetan, aktoreekin batera; eta, beste batzuetan, eurek bakarrik. Ikuskizun animatua eta parte-hartzailea izango dela aurreratu dute, eta gazteei bertaratzeko dei egin diete. Horrekin batera, zehaztu dute aste gutxiren buruan telesailaren 9.0 denboraldia grabatzen hasiko direla-eta adi egoteko.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak