Gizarte Antropologian graduatua, euskararen gaineko ikerketetan parte hartu izan du Beitiak eta bere gradu zein master amaierako lanak hizkuntza antropologiari lotuta egin ditu. Egun, berriz, EHUko doktoregaia da. Bere lanak hizkuntzaren eta kulturaren arteko uztarketaz dihardu, hizkuntzaren biziberritzeari begira garrantzitsuak izan daitezkeen gakoak eskaini ditzakeelakoan.
Iñigo Beitiak hizkuntza biziberritzean praktika eta errepresentazioek duten eragina aztertu du bere lanean, hizkuntza antropologiatik. Praktika komunitateak aktibaziorako eta mudantzarako eman dezakeena xehatu du hainbat adibide jarriz.
Hala, azken urteetan egin diren ikerketetan oinarrituta, gaiaren garapen teorikoa egiten da, lehenik, amaieran eredu bat proposatzeko. Epaimahaiaren arabera, "gaiaren ibilbide historikoa ongi laburtu eta sintetizatzen du", besteak beste.
