Elektrizitatea, gasa edo bestelako erregaien hornidurari dagozkion fakturak ordaintzeko erabili beharko dira Eskoriatzako Udalak jendaurrean jarri dituen laguntzak. Diruz lagundu daitezkeen gastuak, beraz, kontsumo horiei dagozkienak izango dira, bai eta komunitate-gastuak ere, horiek berokuntza barne hartzen dutenean, 2021eko abenduaren 1etik 2022ko apirilaren 31ra bitartean.
30.000 euroko laguntza
Laguntzaren zenbatekoa gastu energetikoaren zenbateko justifikatua izango da, diruz lagundu daitekeen aldian. Guztira, Udalak 30.000 euro bideratuko ditu programa horretara, eta kopuru hori handitu egin ahal izango da, beharrezkoa izanez gero. Laguntzaren zenbatekoa 30 eurokoa izango da hilean familia-unitate bakoitzerako; 150 eurokoa, gehienez ere; eta, nolanahi ere, ezingo da izan onuradunak benetan ordaindutako dirulaguntzaren xede diren gastuen zenbatekoa baino handiagoa.
Bete beharreko baldintzak
Deialdi horretara bildu ahal izango dira, besteak beste, honako baldintza hauek betetzen dituzten pertsonak: azken sei hilabeteetan Eskoriatzan etengabe erroldatuta egotea, diruz lagundu daitezkeen gastu horietan parte hartu izana eta energia-gas-tuari aurre egiteko diru-sarrera edo baliabide nahikorik ez izatea. Eskatzaileek gastu horiei aurre egiteko baliabide nahikorik ez dutela ulertuko da familia-unitatearen urteko diru-sarrera osoak 15.682,68 eurotik beherakoak direnean kide bakarreko familientzat, 19.603,44 eurotik beherakoak bi kideko familientzat eta 21.171,78 eurotik beherakoak hiru kide edo gehiagoko familientzat.
Programa honetan aurreikusitako laguntzak bateragarriak izango dira helburu bera duten edo kontzeptu berberak diruz laguntzen dituzten erakunde publiko edo pribatuetatik datozen beste laguntza batzuekin; betiere, gain-finantzaketarik gertatzen ez bada. Muga hori gaindituz gero, programa honen bidez eman beharreko dirulaguntzari gaindikina kenduko zaio. Gainerako baldintzak Udalaren webgunean kontsulta daitezke.
Eskabideak aurkezteko epea
Eskabideak aurkezteko epea abenduaren 1ean hasi eta hilaren 15ean amaituko da.