Joan den domekan, azaroaren 21ean, izan zuten lursail jabetzarik ez duten herritarrek, zozketa bidez, Aldaype,Ehiza eta Arrantza Elkartearen bidez ehizatzeko postua erabiltzeko azken eguna. Orain, ehiza soltean egiteko aukera izango da; hau da, postuan derrigorrez egon barik, oinez eskopetarekin basoan aritzeko aukera. Ehiza-denboraldia kaskarra izan dela adierazi dute Aldaypeko ehiztariek. Hala ere, usoak oraindik pasako diren esperantzarekin daude ehiztariak, eta zenbaitek aprobetxatuko dutela ehizatzeko adierazi dute Aldaype elkartetik.
Zozketa, egun bakarrean
Pandemiaren ondorioz, egunero barik, eguaztenak izan dira postu-banaketa zozketa egunak, eta, bertaratu diren ehiztariek begi onez ikusi dutela horrela egitea adierazi du Aldaype elkarteko Gerardo Canterak. "Joan den eguaztenean egin genuen denboraldi honetako azken zozketa, eta herriko ehiztariak zapore gazi-gozoaz geratu dira. Izan ere, uso-pasea eskasa izan da aurtengoa. Hala ere, birigarroak pasa dira, eta horrekin konformatu behar izan dugu ehiztariok. Lehen, egunero egiten genituen postu banaketak, eta, sarritan, zenbaitek ezin zuten Aldaypeko lokalera bertaratu. Orain, berriz, eguaztenetan, aste osorako postu banaketak egin ditugu, eta, bi ordu eta erdian banaketa eginda, egunero etorri behar ez izatea positiboa izan da guztiontzat", gaineratu du Canterak.
Orain, ehiza modu soltean egiteko aukerarekin, ordutegian ere aldaketak daudela gogorarazi nahi izan du Canterak: "Lehen, eguzkia irten baino ordubete lehenago hasi zintezkeen ehizatzen, eta eguzkia gorde baino ordubete lehenago amaitu behar zenuen. Orain, berriz, 07:30etik 17:30era bitartean ehizatu beharko da".
Batzar orokorra urtarrilean
Aldaype elkarteko juntan kide berak ari dira azken urteotan, eta aldatzeko beharra ikusten dute gaur egungoek. Hala ere, ordezko boluntarioak topatzea ez dela samurra azpimarratu du Canterak: "Aldaypeko juntan egoteko ordezkari faltan gaude; betiko arazoa da. 202 bazkide gara, guztira, eta junta zazpi kidek osatzen dugu. Hala, asmoa da elkartea osatzen dugun bazkideon bi herenak batzea, eta estatutuak aldatzea. Ez dago erabakita, baina zerrendaren arabera juntako kideak aukeratzea izan daiteke irtenbide bat... Urtarrilean egingo dugu batzarra, eta data zehaztuko dugu Gabonetan".