Eskoriatzak ondo hasi du liga. Jokatutako bi partiduak irabazi egin dituzte, eta atzo, zapatua, Batzarreren kontra lortutako puntuei esker dagoeneko aurrealdeko postuetan kokatu da. Maila honetan, baina, garaipenak izerditu egin behar dira, eta lehenengo zatian, behintzat, etxekoak ez ziren Batzarrekoak baino gehiago izan. Minutu asko egin zituen markagailuak 0-0 eta eskoriatzarrek aukera ederren bat edo beste izan zuten, nahiz eta ate aurrean fin ibili ez. Baina, egoera horri buelta eman eta kantxan lan handia eginda lortu zuten etxeko lehenengo garaipena (5-3).
Mondratek, berriz, etxetik kanpora jokatu zuen, Gasteizko Aurreraren kontra. Lehenengo jardunaldian gasteiztarrek errepasoa eman zieten durangarrei (2-9) eta arrasatearrek bazekiten kantxa zaila bisitatu behar zutela. Galdu egin zuten, baina tarte txikiarekin (4-2) partiduan sartuta egon ziren uneoro.
