"Zoragarria izan da, eta bikain atera dela esango nuke", izan dira Narciso Pavoren hitzak txapelketa bukatu bezain laster. Hunkituta zegoen eta esker hitzak izan ditu antolakuntza lanetan lagundu duten guztiendako, kolaboratzaileendako, parte hartu duten sei taldeendako, babesleendako, umeendako eta umeen senitartekoendako. "Urte eta erdi egon gara geldirik, eta zoragarria izan da umeen ilusioa eta motibazioa ikustea. Horrek ez du preziorik. Etorri diren guztiek ulertu dute egoera eta denek errespetatu dituzte protokoloak ezarritako neurriak. Jasotako erantzuna bikaina izan da. Oso eskertuta gaude".
Protokoloak markatutako txapelketa izan da. Sarrerak eta irteerak egiteko ate desberdinak zeuden, plaza mugatuak zituzten kiroldegian eta jokoan ziren taldeen jarraitzaileek bakarrik izan dute partiduak ikusteko aukera, maskara jantzita behar zuen... "Protokoloak gauza asko eskatzen zituen eta guztiak errespetatu dituzte. Milesker denei!", esan du Pavok.
Sei talde, 180 jokalari
Aurreikusi moduan sei talde aritu dira nor baino nor lau kategoriatan: GFS Bilbo (Bizkaia, Bilbo), Kukuiaga (Etxebarri, Bilbo), Salburua (Gasteiz, Araba), Tafa FS edo Sota (Tafalla, Nafarroa), Ibarrarte (Esteribar-Erro, Nafarroa) eta Eskoriatza K.E.
Alebin mailan, Eskoriatza KE eta Salburua taldeek jokatu dute finala. Kanpotarrak nagusitu dira 3-6 emaitzarekin. "Benjaminak eta alebinekin nahastu egin ditugu, eta norgehiagoka oso polita egin dute. Ikuskizuna eman dute jokalariek", azaldu du Pavok.
Infantil mailan, Nafarroako bi talde izan dira aurrez aurre; Tafa FS eta Ibarrarte. Tafallarrak nagusitu dira 3-1.
Kadeteetan, azkenik, Eskoriatza KE-k eta Kukuiagak jokatu dute finala. Bizkaitarrak nagusitu dira 0-3. "Sailkapeneko partidua guk irabazi genuen, baina gaurkoan hobeak izan dira eta zoriondu egi behar dira", esan du Pavok.
Hiru finaletik bi jokatu dituzte Eskoriatza K.E.-ko jokalariek. "Hainbeste denbora ia geldirik egon eta gero ez genekien nola erantzungo genuen, eta egia esan pozik egoteko moduan gaude. Eskoriatzan lan oso polita egiten ari da jende asko oinarrizko taldeekin. Eskailera osatuta daukagu: benjaminak, alebinak, infantilak, jubenilak, kadeteak… Garrantzitsua da".
Hitzaldi interesgarria
Zapatuan lau adituren eskutik izandako mahai-ingurua edo hitzaldia ere nabarmendu gura izan du Pavok. "Mezu oso interesgarriak eta baliagarriak jaso ditugu umeekin lanean dihardugun entrenatzaileek, hezitzaileek eta gurasoek. Umeendako ere interesgarria izan zen. Mila mila esker Teresa Aranzibiari, Jesus Candelasi, Alvaro Gonzalezi eta Jaime Rodriguezi".
