Diberti dantza ikuskizunarekin izan dira Deabru Beltzak taldeko kideak Eskoriatzan. Puntako teknologiarekin bertaratu dira esperimentu bat egitera. Frogatu nahi zuten posible dela ondo pasatzea osasun neurriak errespetatuz. Hala, erronka polita bota diete eskoriatzarrei.
Puntako teknologia ekarri dute froga egiteko; girometroa eta osasunmetroa dituen makina eta poliki-poliki gora egin dute neurketek.
Lehenengo eta behin berotze ariketak egin dituzte. Pandemia dela-eta luzaro geldirik egon diren gorputzak esnatzeko. Besoak, belaunak... Ondoren, koreografiak etorri dira baina eserita egoteko moduan egitekoak. Askotariko musikarekin egin dituzte koreografiak: Saturday Night, Macarena, Asereje... Gaztetxoak ez ezik gurasoak ere mugimenduan ikusi dira.
Esan moduan girometroak zein osasunmetroak gora egin dute apurka-apurka eta denen ahaleginarekin goi jo dute eskoriatzarrek bi neurketetan.
Pozik ziren diberti-dantzariak eta publikoa zer esanik ez! Ondorioa argia izan da: "Plaza martxosoa da Eskoriatza!".
