Zapatu honetan zen egitekoa 25. Eskoriatzako Ferixie, baina ez da ezer antolatu egunerako. Ez dute posturik jarriko, talogileak ere ez dira urtero moduan arituko hain estimatuak diren jakiak prestatzen, dantzak ikusteko ere itxaron egin beharko dute herritarrek, eta txapel jaurtiketa lehiaketarik ere ez da izango. Hala ere, urtero-urtero egiten direnak haurrei gogorarazteko, Arizmendi ikastolako Jose Arana gunekoek zenbait ekintza egingo dituzte gaur, egubakoitza.
"Egoera hobeagoan bageunde, aurten antolatuko genukeen edizioa borobila izango zen; hogeita bosgarren Ferixie, hain zuzen ere, baina ez da ezer antolatu zapaturako. Hala ere, gaur, hainbat ekintza egingo ditugu Jose Arana guneko haurrekin. Batetik, denon artean apaingarriak egingo ditugu ikastetxean. Txorimaloak ere egingo ditugu, etxetik ekarritako arropa zaharrekin eta bestelako elementuekin… Bestetik, gunean bertan, jolasak izango dira haur txikienentzat; eta nagusiek, berriz, ginkana egingo dute herriko zenbait txoko bisitatuz. Hala ere, eguraldi honekin, ginkana alde batera utzi, eta gunean geratuko gara tailerrak egiten, seguruenik", adierazi du Maider Nafarratek, Jose Arana guneko hezitzaileak.
Jolasak Jose Aranan
Burbuila taldeetan daude antolatuta Jose Aranako haurrak, eta talde horietan banatuta, ikastetxean geratuko dira, eta zenbait ekintza egingo dituzte bertan, musikaz girotuta. Kasu horretan ere, txistorra jateko aprobetxatuko dute txikienek.
Datorren urtean egiteko gogoz
"Aurten modu honetan egitea erabaki dugu. Hala ere, pandemiaren ondorioz, bi urteko geldiunearen ostean, herritarrekin batera ospatzeko gogoz antolatuko dugu datorren urtean izango den 25. edizioa", adierazi du Nafarratek.