Zapla bertso saioa 18:00etan izango da, eta Gipuzkoako zenbait bertsolari gazteren hausnarketatik sortutakoa plazaratzeko modu berri gisa aurkeztu dute egitasmoa. Parte hartuko duten bertsolariak honako hauek izango dira: Maddi Aiestaran, Julene Iturbe, Asier Ibarguren eta Onintza Enbeita, eta gai-jartzailea, berriz, Olatz Zuazubiskar izango da. Saioa debalde da, baina gonbidapenak eskatu behar dira, bertsozale.eus-en edo 943 71 46 88 telefono zenbakira deituta.
"Gipuzkoako bertsozale elkarteak bultzatuta tailer batzuk izan genituen bertsolari gazteok. Horietatik ateratako ondorioekin antolatu dugu Zapla. Sei saio izango dira, guztira, sei bertsoeskoletako kideak egon garelako parte hartzen tailerretan. Normalean, bertsolari erreferenteen artean gazte bakarra izan ohi da, eta, kasu honetan, buelta eman nahi izan diogu ohiko egoerari", adierazi du Zapla zirkuituko antolaketa taldeko Haizea Arana bertsolari eskoriatzarrak.
