Ohorezko Mailako Zuzenak aulki gurpilduneko saskibaloi taldeak lau denboraldi daramatza kategoria berean, eta bi jardunaldi geratzen dira bertan jarraituko duen erabakitzeko edo promozio partidua jokatu eta kategoriaz jaisteko arriskuaren aurrean jartzeko. Horretarako, zapatuan Getaferen aurka irabazi beharra dute, nahitaez.
Ezinbesteko garaipena
Joan den astean Las Rozas taldearen aurka funtsezko garaipena lortu zuten Zuzenak taldekoek. Horri esker, denboraldi honetarako ezarri zuten helburua, maila mantentzea, ia bete dute. Hala ere, asteburu honetan jokatuko dituzten denboraldiko azken bi jardunaldietan egindakoek erabakiko dute euren etorkizuna. Martin Perez Zuzenak taldeko kapitain eta jokalari eskoriatzarra baikor dago, eta denboraldi honi begirako helburua beteko dutela dio: "Irabazi beharreko partidua joan den astekoa izan zen, eta lortu genuen. Hala ere, zapatuan Getaferen aurka jokatuko dugu, Madrilen, 17:30ean, eta irabazi beharra dugu. Aurkariaren emaitzak ikusita, eginda dagoela eman dezake, baina ezin gera erlaxatu. Denboraldi honetan jokatutako 21 jardunaldietatik guztiak galdu ditu Getafek, eta, seguruenik, irabazi egingo dugu. Horren ostean, domekan, Ilunionen aurka arituko gara, 19:00etan; COVID-19agatik atzeratutako partidua da. Kasu horretan, aurkari horiek ez dute denboraldi oso ona egin, baina talde sendoa da, eta irabazteko aukera gutxi ditugu. Gauzak oker irtenez gero, kategoriaz jaitsiko ginateke, lehenengo mailara, baina horretarako, Getaferen aurkakoa eta promozioko partidua ere galdu beharko genuke", adierazi du Perezek.
Maskararekin jokatzearen alde
Desgaitasun Fisikoa duten Pertsonen Espainiako Kirol Federazioak ez du derrigortzen maskararekin lehiatzea, baina Zuzenak taldeak hala jokatzea erabaki zuela adierazi du Perezek: "Gure taldean denok jokatzen dugu maskararekin, eta, gurekin batera, Getafek eta beste talderen batek. Gero, gainontzeko taldeetako jokalari batzuek euren erabakiz erabiltzen dute…".
Erronka berriak zehazteko gertu
Denboraldia asteburuan amaitutzat eman ostean, entrenamenduekin jarraituko dutelakoan dago Perez, eta datorren ikasturtera begirako helburuak zehazten hasiko direla gaineratu du eskoriatzarrak.