Idoia Asurmendi aramaioarrari musikarekiko zaletasuna familia girotik datorkio eta txikitatik hasi zen etxeko musika instrumentuekin esperimentatzen. Aisialdia ere horretan eman du urte luzez, hainbat abesbatzatan kantatuz eta piano ikasketak burutuz. Gitarrarekin ere ondo moldatzen da, eta horixe demostratzera etorriko da Zaldibar antzokira, zapatuan, Joanes Ederra kontrabaxuarekin oholtza gainean bidelagun izango duela. Emanaldi akustikoa izango da eskainiko dutena, eta sarrerak bost eurotan erosi daitezke, aldez aurretik, Manuel Muñoz kiroldegian.
Asurmendi duela urte batzuk inguruko herrietan kontzertuak ematen hasi zen, bakarlari. Hasieran, euskal abestien zein kanpoko pop-rock eta soul estiloetako abestien bertsioak egiten zituen, baina orain, kantuak konposatzen ditu, eta, hainbat kasutan, poesia egiten duen Maria Osesen lanak berearekin uztartzen ditu.
Inkisizioaren segadak hizpide
Idoia Asurmendiren emanaldi akustikoarekin batera, ekitaldi ugari eta askotarikoak izango dira Eskoriatzan, asteburuko kultura agendaren barruan. Egubakoitzean, esaterako, Asisko Urmeneta marrazkilari eta komiki gidoilaria izango da Zaldibar antzokian, Sorgin ehiza Euskal Herrian XVI. eta XVII. mendeetan hitzaldia egiten, 19:00etan. Urmenetak idatzitako Sugarren mende komiki-liburuan jasotakoak kontatuko dizkie bertaratzen direnei, besteak beste, eta liburua salgai izango du bertan.
'Loratu' azoka Ibarraundin
Zapatuan, berriz, Jakoba Errekondo paisajista eta agronomoa izango da Etxeko loreak liburuaren aurkezpena egiten, eta galderak eta zalantzak argitzen, 11:00etan, Ibarraundi museoan. Horrekin batera, Loratu, izenpean, lore eta landare azoka txikia egingo da museo kanpoaldean, 10:00etatik 14:00etara bitartean. Bertan, etxeko loreak eta landareak izango dira: geranioak, liliak, begoniak... Baratzeko haziak eta landareak: piperrak, tomateak, letxugak, kipulak… Lurra, tresnak, ongarriak, eta abar. Gainera, Eskoriatzako Anduaga Pentsuakekoek eta Usurbilgo Urtineak Loreek jarriko dituzten postuak.
Yogurina Borovaren ikuskizuna
Domekan, aldiz, Eidabe antzerki taldeko Maria Urcelay eta Yogurinha Borova Meri Mari eta Lari ikuskizunarekin izango dira, arratsaldeko bostetan, Zaldibar antzokian. Sarrerak hiru eurotan erosi daitezke aldez aurretik, kiroldegian.
