Urteroko ohitura politari jarraituz, iaz jaiotako haurren izenean zuhaitzak landatuko dituzte Eskoriatzan. Izan ere, norberak landatutako zuhaitz bat izatea, zaintzea eta urte askoren ostean handitu egin dela ikustea begi onez ikusten dute urteroko parte hartzaileek.
Aurten, baina, egoerak baldintzatuta, berrikuntzak izango dira egitasmoan, baina kontuan izanda "parte-hartzaileei" zuhaitz landaketa ekintza "asko gustatzen" zaiela, eta "egingarria" dela erabakita, zuhaitz landaketa aurrera eramatea erabaki dute antolatzaileek, neurri guztiak hartuta.
Familia osoak batu barik
2020an Eskoriatzan jaiotako haurrak hogei izan direnez, guztira bost zuhaitz sartuko dituzte Ibarraundi museo inguruan. Beste urte batzuetan, haur bakoitzeko bat landatu izan da, baina, egoerak hala behartuta eta pilaketak saihesteko, eta ekintza azkar bukatzeko asmoz, hala egitea erabaki dute. Horrekin batera, familia bakoitzeko pertsona bakarrak hartuko duela parte adierazi dute antolatzaileek. "Familian egiteko ekintza izan da urtero. Gustura etortzen dira familian egitasmoa gauzatzera, baina aurten ezinezkoa da betiko moduan egitea", adierazi du Saioa Altzuak, Ibarraundi museoko langileak. "Iaz, Arbiñosten landatu genituen zuhaitzak, eta horien egoera ere izan gara ikusten. Izan ere, zuhaitzak landatzeaz batera, gero, zaindu egin behar dira… Ea aurtengoak indartsuak ateratzen diren…".
Zuhaitz mota ezberdinak
Urkia, elorri zuria eta beltza, gurbitza eta makatza izango dira landatuko dituzten zuhaitz motak. Horrekin batera, gorosti pare bat ere sartuko dituztela adierazi dute antolatzaileek.
Hitzordua domekan 12:00etan dute, Ibarraundi museo parean. Izan ere, museoaren bueltan landatuko dituzte zuhaitz guztiak. Hala, bertan elkartu, eta, lehenbizi, zenbait argibide emango dizkiete Ibarraundiko langileek bertaratzen diren herritarrei. Eta gero, aitzurrak hartu eta lanean jarriko dira, zuhaitz bakoitza landatzeko leku egokia ezartzean.