Langileak astelehenean eta martitzenean aritu ziren Gorosarri kale atzeko aparkalekuak asfaltatzen, eta, horrekin batera, zona osoko zorua asfaltatu eta Olazar eta Gorosarri arteko bidegurutzea ere asfaltatu dute. Hala, Olazar eta Eduardo Gorosarri auzo atzeko aparkalekuen zona itxita izan da egunotan.
Asfaltatzea, egun bakarrean
"Gorosarri auzoaren atzeko partean aparkaleku eta oinezkoen babesgune berriak asfaltatzen eta margotzen izan gara egunotan. Lan hauek Gabonen aurretik egitea aurreikusita zegoen, baina atzeratu egin ziren. Eta gero, eguraldiaren eraginez, elurra eta hotza… ezin eginik egon gara", adierazi du Josu Ezkurdiak, Eskoriatzako Udaleko Hirigintza eta Mugikortasun batzordeburuak.
Denbora batez lanak geldi egon diren arren, geratzen ziren lanak berrartu, eta aste honetan hasi eta amaitu dituzte egin beharrekoak. "Asfaltatzeko makinak etorri direla aprobetxatuz, geratzen zitzaizkigun aparkalekuko asfaltatze lan horiek zein Olazar kalea eta bi auzoen arteko bidegurutzea asfaltatzen aritu gara. Asfaltatze lan guztiek 11.000 euroko kostua izan dute".