Ligan garaipena besterik ezagutzen ez duen talde bakarra da Eskoriatza KE. Estatistika borobil hori mantendu nahi dute Iker Molinaren mutilek, eta, bide batez, atzetik dituzten taldeekiko aldea handitu. Zapatu arratsaldean, aukera ederra izango dute horretarako, bi puntu atzetik dagoen Batzarre talde gasteiztarraren bisita jasoko baitute Miguel Muñoz kiroldegian, 18:00etan hasita. Irabaziz gero, bost puntuko errenta lortuko lukete eskoriatzarrek euren zapatuko aurkariarekiko, zeintzuek bigarren postuari eutsiko lioketen. Txapelketaren herenera iritsita, gainontzeko partidei konfiantza handiz aurre egiteko moduan jarriko litzateke, beraz, Eskoriatza.
Hilabeteko etenaldiak ez dirudi txapelketako liderrari kalterik egin dionik; Eskoriatzak Aerolink Elorrietakori egin zion bisita joan den zapatuan, eta tarte txikienagatik garaipena etxera eraman zuen. Areto futboleko Hirugarren Maila, edo Liga Nazionala, urriko azken egunean hasi zuten, Gasteizko Aurreraren zelaian 1-4 irabazita. Bost goleko aldeagatik lortu zuten garaipena hurrengo asteko etxeko partidan, Scorpio Alkidebaren kontura.
Mondrate eta UDA, berdinduta
Maila bat beherago dauden bailarako beste bi taldeek, UDAk eta Mondratek, joan den asteburuan ekin zioten lehiari. Aretxabaletarrek seina egin zuten Goierrirekin; arrasatearrek, ostera, launa Zirauntzarekin. Biak bisitari aritu ziren aurkarien aurrean.
Lehen garaipena eskuratzera kantxaratuko dira, beraz, ibarreko bi ordezkariak. Mondratek Uxoa talde laudiarra jasoko du zapatuan Musakolako kiroldegian, 18:00etan hasita. UDAk Zabalgana Zaraunari egingo dio aurre hurrengo egunean, 17:30ean, Ibarra kiroldegian.