Urriarekin batera bonu berdeak eta gorriak iraungiko dira. Hau da, urriaren 31tik aurrera ez dira bonu gorriak eta berdeak hartuko. Aldiz, azaroaren 2tik abenduaren 31 bitartean, bonu berriak, urdinak, onartuko dira.
Funtzionamendu berberarekin
"Guztira, 1.000 bonu urdin jarriko ditugu salgai Ibarraundi museoan, eta, funtzionamenduari dagokionez, ez da aldaketarik aurreikusten", adierazi du Nerea Arana Ibarraundiko teknikariak. Hori horrela, 15 euroren truke 30 gastatzeko aukera emango zaie herritarrei. Bonuak 5, 10 eta 15 eurotan banatuta egongo dira, eta Eskoriatza Bizirik bonuen kanpainari atxikitako edozein establezimendutan erabiltzeko aukera egongo da; besteak beste, ostalaritzako establezimenduetan, fisioterapia eta osteopatia zentroetan, ile-apaindegietan, estetika zentroetan, janari denda batzuetan eta liburu dendan. Hala ere, bonuak hartzen dituzten komertzio edo zerbitzuetako establezimenduek bonuak hartzen dituztela identifikatzeko kartela izaten jarraituko dute eta Ibarraundin salduko dira astelehenetan eta egubakoitzetan 11:00etatik 13:30era eta eguaztenetan 17:00etatik 19:30era. Nortasun agiria eskatuko da momentuan, eta ordainketa kreditu txartelarekin egin beharko da.