Ate irekiak eginda, hasi dute ikasturte berria Tortolis ludotekako haurrek. Bertako arduradunek adierazi dutenez, harrera ona izan dute, eta, aurrera begira, ikasturte osoan zehar hala jarraitu gura dutela gaineratu dute: "Ate irekietan plaza guztiak bete ziren eta haurrak oso pozik ari dira. Orain, Gaba Beltzaren gaineko prestaketa lanetan dihardugu. Horretarako, sorpresa bikaina prestatuko diegu haurrei, scape room-a", adierazi du Nekane Atxaga arduradunak.
'Scape room'-a ludotekan
Gaba Beltzaren bueltan, urriaren 31n, 16:30etik 19:30era bitartean, scape room-a izango dute haurrek Tortolisen. 8 eta 12 urte bitarteko haurrei zuzenduta egongo da, bazkide direnei eta bazkide ez direnei, eta, hala, egun batez, ludoteka scape room bihurtuko dute.
Eguna iritsi arte scape roomak izango duen gaia adierazi barik, lau eta bost haurreko talde txikietan egingo da, eta izen ematea ludotekan bertan izango da, urriaren 26tik 30era bitartean.