Udalak martxan jarritako Eskoriatza Bizirik bonuen kanpainaren hirugarren faseari azaro hasieran ekingo zaio. Aurreko bi faseetako bonu guztiak salduta daude jada. Berdeak ziren lehen faseko txartelak, eta gorriak bigarrenekoak. Biak ala biak urriaren 31 baino lehen erabili beharko dira. Behin hori amaituta emango zaio hasiera hurrengo faseari; 1.000 txartel aterako dituzte eta urdinak izango dira. Urte amaierara arte erabili ahal izango dira; abenduaren 31 izango da txartelak trukatzeko azken eguna.
Eskoriatzako Udalak ez du aurreikusi aldaketarik hirugarren faserako. Hasiera batean, funtzionamendua bera izango da. Orain arte bezala, txartelak Ibarraundi museoan egongo dira salgai: astelehen eta egubakoitzetan 11:00etatik 13:30etara eta eguaztenetan 17:00etatik 19:30era. Eskoriatzan erroldatuta dagoen adinez nagusi den edozeinek izango du txartel horiek erosteko aukera.
Bonu bakoitzak 30 euroko balioa du: 5 euro, 10 euro eta 15 euroko zatitan banatuta daude, eta zatiezinak izango dira. Gauzak horrela, 15 euroren truke, 30 euroko balioa duen bonua jasoko dute herritarrek Udalaren partetik.
Askotariko establezimenduetan erabili daitezke txartelok: ostalaritzan, fisioterapia edo osteopatia zentroetan, ile-apaindegi edo estetika zentroetan zein janari eta liburu dendetan, esaterako. Familia unitateko kide guztiek erosi ahalko dituzte bonuak, baina pertsona bakoitzak bonu bakarra eskuratu ahal izango du.
COVID-19aren pandemiak eragindako krisiari buelta emateko asmotan jarri zuen martxan kanpaina Udalak. Herriko negozioei laguntzeko modu bezala sortu zen ekimena, baita salerosketak pizteko eta egoerak kaltetutako familiei laguntzeko era moduan ere.
Balorazio positiboa
Eskoriatzako Udalak modu positiboan baloratu du bonuen kanpaina. Azaldu dutenez, pozik daude ekimenak izan duen erantzunarekin. Horrez gain, adierazi dute bai herritarrak, baita dendariak ere "gustura" daudela txartelen kanpainarekin.