Enaitz Testa 13 urteko motorzale eskoriatzarra aurten hasi da MX85 CC kategorian lehiatzen, eta hasi bezain pronto emaitza bikainak lortzen ari da. Izan ere, Euskadiko txapelketaren barruan, Nafarroan egin diren bi lasterketak irabazi ditu eta liderra da sailkapenean. Horrekin batera, Yamahak antolatzen duen Espainiako txapelketan egindako lan onagatik Europako txapelketarako sailkatu da. Hala, Belgikan urriaren 24an eta 25ean izango diren lasterketetan arituko da. Horietan parte hartu ostean, berriz, Euskadiko txapelketako lasterketa izango du, Zallan, azaroaren 8an.
Kategoria berrian, bikain
Ruben Testa Enaitzen aitak adierazi du urte zaila ari dela izaten, baina emaitza bikainak lortzen ari dela bere semea: "MX65 CC kategoriatik 85ekora saltoa eman berri, oso ondo egokitu da motorrera Enaitz, eta albiste pozgarria da Yamahak antolatutako Europako finalerako sailkatu izana. Espainiakoan laugarren postuan geratu da, eta horrek eman dio Europakoan sartzeko txartela. Ea bertan zer moduz aritzen den. Gainera, asteburu berean munduko txapelketa ere jokatuko da leku berean, Belgikan, eta haurrek txapelketaz gozatzeko aukera izango dute, euren lasterketak egiteaz batera".
Entrenatzeko zailtasunak
Lasterketa onak egiten ari da Enaitz, baina entrenatzeko aukera murritzak dituela adierazi du Ruben Testak: "Zaila dugu entrenatzea, eta ez orain bakarrik, pandemia garaian. Lasterketa bat prestatu gura badugu, inguruan ez dugu motorrarekin aritzeko gunerik, eta gertuen dugun eremua Burgosen dago. Hala, konplexua da denboraldian zehar erritmoa mantentzea, lasterketak behar bezala prestatzea, eta hainbeste desplazamendu egitea ere gogorra izaten eurentzat".
Anaia txikia, nagusiari jarraiki
Aratz Testa, Enaitzen anaia txikia, berriz, MX65 CC kategorian ari da lehiatzen, eta, anaia nagusiaren pausoei jarraiki, denboraldi honetan lan ona egingo duela aurreikusten du bi motorzale eskoriatzarraren aitak.