2002. urtean jaiotako Eskoriatzako neska-mutilak izango dira aurten protagonista Santa Ageda egunaren bueltan. Izan ere, ohiturari jarraituz, santa-eskean arituko dira zenbait egunez, eta dantzak egingo dituzte Fernando Eskoriatza plazan.
Urte berean jaiotako eskoriatzarrak gehiago diren arren, 41 izango dira, guztira, Santa Ageda egunaren bueltan herritarren aurrean dantzan arituko direnak. Zortzi entsegu izan dituzte, oraingoz, eta gogotsu daude kantuan aritzeko. Urduritasunak izan arren, baita herritarren aurrean dantza egiteko ere.
Urteroko plangintza jarraituz
Santa Ageda egun bezperan, otsailaren 4an, Eskoriatzako zazpi elizateetan zehar arituko dira baserriz baserri kantueskean, eta otsailaren 5ean, Santa Ageda egunean, aldiz, herriko kaleetan zehar eta ikastetxeetan arituko dira. Honekin batera, urteroko ohiturari jarraituz, azken entsegua egin eta Jose Arana nagusien egoitzako egoiliarren aurrean dantza egitera joango dira, 18:00etan. Ondoren, berriz, Fernando Eskoriatza plazan egingo dute dantza, 19:00etan, herritarren aurrean, eta bertan demostratuko dute zein ondo entseatu duten. Otsailaren 6an, eguenean, berriz, herriko kaleetan zehar arituko dira santa-eskean.
Egun bat lehenago hasita
Otsailaren 4an, 5ean, eta 6an ateratzea izan arren hasierako asmoa, otsailaren 3an ere, astelehenean, aterako direla adierazi du Uxia Alvarezek, aurtengo kintoak: "Gogoz gaude Santa Ageda egunaren bueltan santaeskean aritzeko eta baita dantza egiteko ere. Gogoz aritu gara entseatzen; guztira, zortzi entsegu izan ditugu, eta, oraindik zer hobetu dugun arren, ondo prestatuta aterako garela plazara uste dut. Horrekin batera, egun bat lehenago hastea erabaki dugu. Motorrak berotze aldera…".
Kinttaden Egunera batuz
Kinttaden Eguna –bederatzigarren edizioa– otsailaren 8an ospatuko da, zapatuan, eta egunerako santa-eskera eta dantzara animatu diren 41 gazteak bazkaltzera joango direla adierazi dute: "Kinttaden Egunean bazkaria egingo dugu, eta, Eskoriatzako kintada ugari batzen direnez, guk ere ez dugu hutsik egingo. Hala ere, txintxo-txintxo ibiliko gara; izan ere, otsailaren 9an, domekan, berriz egingo dugu dantza Fernando Eskoriatza plazan, 19:00etan", adierazi du Alvarezek.
