Eskoriatzan ondo errotuta dagoen ekimena da; izan ere, badira hamabost bat urte zuhaitzak landatzen dituztena. Aurten, gainera, indar handiagoa hartu du ekimenak herriko lagun talde batek zuhaitzak landatzeko eskatu diolako Udalari, "mundua zuhaitzik gabe geratzen dabilela ikusita". 28 familia ziren deituak eta gutxiago agertu arren guztien artean landatu dituzte Ibarraundi museoko langileek ekarritako zuhaitz guztiak.
Lurra ez zela guztiz egokia esan duenik egon da, harri asko agertu direlako, eta Ibarraundiko Saioa Altzuak onartu du kosta egiten zaiela paraje hartan sustraitzea: "Egia da aurretik ez dugula esperientzia onik izan. Aurten aldatu egin ditugu zuhaitz motak eta ea samurrago hazten diren hauek". Hainbat gurasok adierazi du gertutik jarraituko dutela landatutakoen hazkuntza eta umeekin gerturatuko direla.