Jarrera eta kalitatea, soberan

Eskoriatzako Errekan Gora jaialdiaren barruan, Eskean Kristo talde bizkaitarra izan zen atzo gauean agertokira igo zena. Rock doinuekin ederki girotu zuten gaua.

Ordua, 22:30. Lekua, Gernika plaza. Eta Eskean Kristo taldea agertokira igotzeko minutu gutxiren faltan, jende gehiegi ere ez kontzerturako; zeudenak, gainera, eserita. Egoera horrek, baina, ez zuen gehiegi iraun. Izan ere bizkaitarrak lehenengo doinuak jotzen hasi orduko hasi ziren entzuleak ere berotzen. Emanaldia amaitzerako, festa giroa zen nagusi plazan.

Arratiakoek maketa bat eta hiru disko dituzte kalean, azkena, iaz kaleratu zuten Beste Belaze Batzuen Gozoan izenekoa. Berauetan jasotako rock piezek, ukitu psikodelikoz eta letra biziz jantzitakoek, igo zuten gauaren tenperatura: Mamamamarroa; Zaldiak Negarrez; Latigo!; Refugee... Abestiek bai, baina baita taldekideen jarrera lotsagabe, konplize eta izerditsuak ere. Eta publikoa guztiz poltsikoratzeko, Iguana jo bitartean ikusleen artean nahastu ziren Pello Artabe abeslaria eta Peio Artetxe baxu jotzailea.

Zuzeneko indartsua eta nortasuna erakutsi zuten atzo bizkaitarrek Eskoriatzan; nortasun paregabea. Nor ausartuko litzateke bestela publikoa azkenengoz agurtzeko beste boskote baten, Spice Girlsen, Wannabe erabiltzera?