Urtero egiten duten hitzordura, Olazar erretiratu elkarteko 49 kide joan ziren, eta, bapo afaltzeaz batera, sorpresak ere izan zituzten bertan batu ziren nagusienek. Izan ere, 101 urteko Pablo Gamboak eta Elena San Vicentek opari bana jaso zuten.
Donostiara jaietara
Abuztuan, berriz, irteera izango dute. Hain zuzen ere, Donostiako Aste Nagusira joango dira egun-pasa, eta, egunari amaiera emateko, hain gogoko dituzten su artifizialak ikusteko aprobetxatuko dute.
Honekin batera, irailera begira, euskara ikasteko ikastaroa ireki dute. Bi mailatan banatuta, 180 orduko ikastaroa izango da; bi egun astean, eta bi ordu eguneko. Hala, interesdunek elkarteko bulegotik pasatu beharko dute informazioa jasotzera.