Zapatuan, 18:00etan, jaiei hasiera emateko, etxafuegoak jaurtiko dituzte, eta festa kanpaiak joko dituzte Arientza kanpaijotzaile eskolakoek. 21:00etan, berriz, auzo-afaria izango dute Leixarrape elkartean. 20 lagun inguru batuko dira afaltzeko, eta menua honako hau izango da: txistorra, urdaiazpikoa eta onddoz-kroketak hasteko, legatza gulekin ondoren, eta postrerako, ijito-besoa esne-gain eta izozkiarekin. Honen ostean, afalostea girotzeko, 23:00etan, AZ Gaubelakoak izango dira musika jartzen. Erromerietako kantuak jarriko dituzte, auzotarrak dantzan jartzeko asmoz.
Domekan, berriz, meza izango da, urtero moduan, Santa Magdalena elizan. 11:30ean hasiko da, eta, amaitzean, luntxa izango da bertaratzen diren guztientzat.