Musika material bilketa errefuxiatu siriarrentzat

Zenbait musika instrumentu.

Mugarik gabeko musikariak GKEk Instrumentu bankua izeneko kanpainaren beste edizio bat jarri du martxan, musika tresnak eta musika osagarriak batu eta errefuxiatu siriarren kanpalekuetara bidaltzeko, eta, horrekin, gerra eta bonba hotsak entzun ordez musika hotsak entzuten laguntzeko.

Hori horrela, Beheko Errota musika eskolak bat egin du egitasmoarekin, eta herritarrak animatu nahi ditu bertan parte hartzera. Horretarako, eskatzen dute edozein musika material –hala nola musika jostailuak, partiturak, tresnak eta osagarriak– eman nahi duten pertsonek kultura etxera eramateko material hori –08:00etatik 14:00etara bitartean–. Irailaren 2tik aurrera, berriz, musika eskolan bertan ere utzi ahal izango dira. Behin materiala jasota, sailkatu eta bildu egingo dute, kanpalekuetara urte amaiera aldera iritsi dadin.