Eskoriatzako bigarren slalom erakustaldiak 23 pilotu batu zituen –tartean lau eskoriatzar zeuden–. Zoru bustiaren gainean jardun zuten pilotuek, eta eurendako abantaila zena ikusleendako traba izan zen, eguraldiak ez zuelako batere lagundu. Hala, Bakio Motor Sporteko Asier Tejado izan zen, Demon Car-arekin onena. Turismoen artean, berriz, BMWarekin Aritz Aznar izan zen trebeena.
BMW asko –hamasei guztira–, Mercedes Demon car eta Speed car bana, eta aurreko trakziodun bakarren bat – Luis Angel Buisanen Ford Escort-a, esaterako. Guztiak ahalegindu ziren Eskoriatzako estazio zaharreko asfalto gainean erakustaldia ematen, eta antolatzaileek prestatutako zirkuitua ahalik eta azkarren betetzen. 1.08.124 ehuneneko denborarekin Asier Tejadok ez zuen kontrariorik izan, Demon car auto txikiak abantaila handia ematen ziolako. Turismoen artean lehia handiagoa egon zen, eta hor Aritz Aznar gailendu zen (BMW E36). Debagoieneko azkarrenen artean Joseba Frutos nabarmendu zen (BMW 325i), bosgarren postuan (1.24.66).
