Urteroko hitzordua gauzatuko dute Eskoriatzako Olazar Erretiratu Elkarteko kideek zapatu honetan. Hain zuzen ere, Aginaga sagardotegira irteera. Ederto bazkaltzeaz gain, hainbat herritan egingo dute geldialdia. "Sagardotegira egiten dugun irteera honek arrakasta handia izaten du beti. Elkarteko kideak gogotsu egoten dira eguna noiz helduko, gainera. Ederto tratatzen gaituzte; beraz, hainbat urtez goaz errepikatzen leku bera", adierazi du Pedro Hernandok, Olazar Erretiratu Elkarteko presidenteak.
Autobusez joango dira irteerara, eta 08:30ean jarriko dira martxan. Lehenbizi, Tolosako merkatuan egingo dute geldialdia. Han, buelta bat emanaz, bertako produktuak ikusteko aprobetxatuko dute. Gero, Tolosatik Donostiarako bidea hartuko dute, eta bertan, txikiteoa egingo dute bazkal aurretik. Aginaga sagardotegian bapo jan ostean, berriz, Zarautzera joango dira. Paseotxo bat egin ostean, Eskoriatzara bueltatuko dira.