Denboraldi borobila egiten ari da Euskal Ligan lehiatzen ari den Eskoriatza areto futbol taldea. Bi jardunaldi geratzen dira liga amaitzeko, eta zapatuan jokatuko duten partiduan hiru puntuak lortuz gero, Maila Nazionalerako txartela lortuko dute Iker Molinaren mutilek.
Momentu honetan, bigarrenak dira sailkapenean, 38 punturekin, eta puntu bakarrera dago Scorpio taldea, hirugarrenean. Laugarrena, berriz, Mahastiak Labastida da eta bosgarrena, Tolosala. "Lau taldeok ditugu aukerak Hirugarren Mailara pasatzeko. Izan ere, sailkapeneko lehenengo hirurak igotzen dira mailaz, eta lehenengo postuan dagoen Gernika dagoeneko ligako txapelduna da, eta lortu du igoera. Tolosalak, agian, du zailen, baina halakoetan edozer gerta litekeela denok dakigu. Guk etxean jokatzen dugu, eta hori ere guretzako positiboa da. Gainera, aurkariek ez dute ezer jokoan, baina azken jardunaldietan emaitza onak izan dituzte, eta, beraz, partidu gogorra, gaiztoa eta zikina izango dela aurreikusten dugu. Irabazi beharra daukagu hala edo nola…", adierazi du Iker Molina entrenatzaileak.
Ametsa errealitate bihurtu guran
2004-2005 denboraldian Maila Nazionalean izan zen Eskoriatza areto futbol taldea. Orain, hamalau urteren ondoren, berriz, lortu nahi dute igoera eskoriatzarrek. Hala, herritarrei Manuel Muñozera joateko gonbita egin nahi diete, harmailak bete-beteta izan daitezen eta, garaipena lortuz gero, ospakizun bikaina egiteko.
Emakumezkoak, fase berrian
Senior mailako emakumezkoak, berriz, lehenengo lau postuen artean sailkatuta, ligako txapeldun izateko fase berrian sartuta daude. Pasa den astean, Lauburu Ibarra taldearen aurka 3-1 irabazi zuten, eta, pauso handia eman ostean, hurrengo partidua gaur izango dute, Ordiziaren aurka, 22:00etan, Manuel Muñozen.