Azaroaren 25a da Indarkeria Matxistaren Kontrako Nazioarteko Eguna, eta, horren bueltan, hainbat ekintza izango dira datorren astean Eskoriatzan. Asteon, bestalde, Bertha Gaztelumendik zuzendutako Volar izeneko dokumentalaren proiekzioa izan da, Zaldibar antzokian
Herritarrek eguaztenean ikusi ahal izan zuten ikus-entzunezkoak indarkeria jasan duten bederatzi emakumeren testigantzak jasotzen ditu, eta lan horren helburua da testigantzen bitartez indarkeriazko jokaerak aldatzea eta herritarrak kontzientziatzea. Hala, proiekzioaren ostean, Asociacion de Mujeres al Cuadrado elkarteko bi kidek solasaldia eskaini zuten. Aholkuak eman zituzten, genero berdintasuna eta indarkeriarik gabeko jendartea errealitatea izan daitezen, eta ez utopia.
Elkarretaratzea domekan
Domekarako, 12:00etarako, elkarretaratzea deitu dute Eskoriatzako Udalak, Feminista Taldeak eta Gu Denon Elkarteak. Hain zuzen, Fernando Eskoriatza plazan izango da, eta Udaleko ordezkari politikoek herritarrak gonbidatu nahi dituzte Indarkeria Matxistaren Kontrako Egunarekin bat egitera. Horrekin batera, pankarta bat egingo dute, gertatu diren indarkeria matxista datuekin, eta, elkarretaratzea amaitzean, pankarta herriko sarrerako zubian jarriko dute.
Tratu txarren gaineko hitzaldia
Martitzenean, berriz, Tratu txarrak, erasotzailearen profila izeneko hitzaldia izango da, 18:00etan, kultura etxean. Ele bitan izango den saioa Euskadiko Birgizarteratze Institutuko Jorge Porrasek eskainiko du.
Gaztelekuko ekintzak
Indarkeria Matxistaren Kontrako Egunarekin bat eginez, hainbat ekintza antolatu dituzte gaztelekuko nerabeek. Zapatuan, 18:00etan, Gaztelekuko gazte nagusienek feminismoa zer den azalduko diete gazteenei, merendola baten bueltan.
Domekan, aldiz, 18:00etan, txoko hezkidetzailea inauguratuko dute, eta, ostean, trikiti doinuz beteta egongo den kontzertua eskainiko du Gona Gorriak, Eskoriatzako neska gazteek osatutako taldeak.