Irailaren 22an izango da Goitibehera txapelketa Eskoriatzan, aurten, seigarren edizioa izango dena, eta egun horretara begira antolatu dute tailerra antolatzaileek, aurreko edizioetan egin duten moduan. Hala, goitibehera bat prestatu edo egin nahi duen edonorentzat zabalik egongo da tailerra. Oinarrizko materiala, berriz, norbanako bakoitzak eraman beharko du; hau da: bizikletaren eskulekua, gurpilak, eserlekua… Eta bertan izango direnek laguntza eskainiko dute; batez ere, soldatze lanetarako.
Goitibeheretan aditu Jose Angel Urrutiak gidatuko du tailerra, eta mota askotariko goitibeherak puntuan jartzeko aprobetxatu ahal izango dute bertaratzen diren haurrek, gazteek eta nerabeek.
