'Desbloqueadas' antzerkiak eskoriatzarren emozioak lapurtu zituen atzo

Xabi Gorostidi 2018ko uzt. 15a, 16:53

Herrian sortu berri den antzerki taldeak estreinako emanaldia egin zuen atzo Zaldibar antzokian. Butakak goraino bete ziren, eta antzezleek barruak hustu zituzten herriko ikusleen aurrean. "Atzokoan jaso genuen babesak indarra eman digu, eta orain obra beste leku batzuetan zabaltzea nahiko genuke" adierazi du Patxi Remiro zuzendariak.

Urduritasuna, kontzentrazioa, espektatibak asetzeko presioa... antzerki obra berri bat estreinatzeak guzti hori dakar. Baina, antzerki taldearen lehen emanaldi luzea dela eta herritarren aurrean antzezten dutela gehituz gero, egoera horiek oraindik eta muturrekoagoak izan daitezke.

"Urduri geunden, egia da. Baina gauzak ondo egiteko gogo itzela genuen, eta lortu genuela uste dut. Jendearen berotasuna eta esker ona jaso genituen, eta egia esan, hitzez ezin dugu adierazi atzo jasotakoak zenbateraino hunkitu gintuen".

Bederatzi antzezle eskoriatzarrek ematen diote bizia Desbloqueadas antzerkiari. "Zortzi emakume dira progonistak, bakoitza bere beldurrekin eta blokeoekin. Baina, proiektu bateratu bat aurrera eramateko elkartzen dira, eta horri esker norbere mugak gainditzen dituzte".

"Txalo zaparrada itzela jaso genuen, eta gure espektatibak guztiak gainditu genituen. Oso eskertuta gaude Udalak eta kultura sailak eman diguten laguntzagatik. Eta batez, eskoriatzarren partez jaso dugun babesagatik. Milesker denei!".

Duela hiru urte erein zuten atzoko hazia. Antzerki tailer gisa sortu zen taldea, 20 lagun ingururekin. Pixkanaka taldekide kopuruak behera egin zuen, baina geratu ziren horiek seriotasunez eutsi zioten proiektuari. Hala, duela urtebete hasi ziren Desbloqueadas lanari forma ematen, eta atzokoan ikusi zuen argia. "Atzokoan jaso genuen babesak indarra eman digu, eta orain obra beste leku batzuetan zabaltzea nahiko genuke. Hala ere, merezitako atsedenaldia hartuko dugu, oporrekin batera".

 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak