Abiaduraren zirrara bizi izateko aukera izango dute gaztetxoek aurtengo jaietan

Goitibehera Apotzagan, 2017an.

Herriko gaztetxoen eskaria aintzat hartuta, goitibehera jaitsiera egingo dute San Pedro jaietan, Elorretatik behera. Ekainaren 29an, egubakoitza, izango da, 11:00etan. “Honek ez du esan nahi irailean Apotzagan egiten dena bertan behera geratuko denik, hau osagarria izango da”, azaldu du Jose Angel Urrutia antolatzaileak. Nabarmendu dute ez dela txapelketa izango, saio herrikoia izango dela, 8 urtetik gorako umeek aukera izan dezaten goitibeherekin gozatzeko.

Parte hartzeko derrigorrezkoa izango da aurrez izena ematea –asegurua egiteko ezinbestekoa–. Izena emateko aukera ekainaren 25era artekoa zen. Urrutiak gaineratu du derrigorrezkoa izango dela segurtasun eta babes neurri guztiak betetzea: kaskoa, eskularruak, praka luzeak, eskeletoa... eraman beharko dituzte pilotuek.

Bi mailatan banatuta

Bi mailatan banatuko dituzte parte hartzaileak: errodamenduzkoak eta biktrike. Nabarmendu dute Bolibarko jaitsiera ez dela "aldapa handia" duen ibilbidea.

Ikusteko leku "onak"

Parte hartzaileak bata bestearen atzetik irtengo dira, 30 segundoko tartearekin. "Elorretan behera, etxe berriak dauden tokia eta zubi ingurua izan daitezke ikuskizuna ikusteko leku aproposak", azaldu du Urrutia antolatzaileak.Ekitaldia girotzeko, joan zen eguaztenean, hilaren 20an, goitibehera tailerra egin zuten herriko plazan. Goitibeherak konpontzeko edo egokitzeko erremintak eta laguntza jaso zituzten gaztetxoek.


ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.