'Txotxe' zunda meteorologikoa Marin auzoan lurreratu da

Imanol Beloki Unamuno 2018ko eka. 6a, 14:58

Durangoko Kurutziaga ikastolako DBHko 4. mailako sei ikaslek, zientzietako irakasleek, ikastolako informatikariak eta irrati afizionatu batek osatutako zientzia-taldeak zunda meteorologiko bat askatu zuen maiatzaren 19an, eta, 34.950 metroko altuerara heldu eta eztanda egin ondoren, Eskoriatzako Marin auzoan lurreratu zen, zunda askatu eta bi ordu eta 40 minuturen bueltan.

Maringo auzo-alkate Alberto Letonaren esanetan, berak ez zuen ikusi lurreratzen, baina baliteke auzotarren batek ikusi izana. "Belategi eta Emaldi baserrien artean erori zela uste dut nik, bertan atera baitzuten talde argazkia zundaren bila etorri zirenek. Auzoan ez dut galdetu ea norbaitek ikusi zuen, baina polita izango zen lurreratzea ikustea".

Bi ordu eta 40 minutu airean

Zundari Txotxe izena jarri zioten, Jose Martin Urrutia, Kurutziaga ikastolako irakasle izan zena, gogoratuz. 14:00 inguruan askatu zuten globoa, eta, 34.950 metroko altuerara heldu eta eztanda egin ondoren, Eskoriatzako Marin auzoan lurreratu zen, 16:40 bueltan.

Egindako bidea, argazkitan

Zundaren barnean hiru kamera sartu zituzten, bata gorantz, beste bat alborantz eta beste bat beherantz begira. Hala, bi ordu eta 40 minutuan egindako bidearen bideoa osatu dute argazki bidez.

Kamerez gain, zunda meteorologikoaren kokapena jarraitzeko GPS APRS telemetria gailu bat eta presioa, tenperatura eta hezetasuna neurtzeko Datalogger aparailu bat zeramatzan.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak