Kirola egiteko espazio handiagoa Manuel Muñoz kiroldegian

Harmailen atzean kirola egiteko jarri berri duten gela.

Manuel Muñoz kiroldegia eraberritzeko lanak 2017ko azaroan hasi zituzten, eta dagoeneko erabilgarri dago, nahiz eta hainbat xehetasun falta diren. Obraren lizitazioa 102.000 eurokoa izan zen eta adjudikazioa, aldiz, 78.000 ingurukoa.

Bertan, harmailen atzeko gunea handitu egin dute; hala, gimnasioaren azalera bikoiztu egin da. Bizikleta estatikoak, korrika egiteko aparailuak eta eliptikoa egitekoak jarri dituzte bertan. Horrez gain, beiratea jarri dute, kantxatik datorren zaratatik babestuta egoteko eta kirola lasai egiteko. 

Lanak atzeratu egin dira

Egin beharreko lanen atzerapenaren ondorioz, aurreikusitako prezioa baino gutxiago ordainduko dio Udalak lanak gauzatu dituen enpresari. Hala, aurreztutako dirua beste lan batzuk egiteko erabiliko dute. Honela adierazi du Hirigintza eta Mugikortasun batzordeburu Josu Ezkurdiak: "Leihoa jartzean arazoak izan dira, eta horregatik iraun dute hainbeste lanek, nahiz eta urtarriletik erabilgarri egon den gunea. Hala ere gauza txiki batzuk geratzen dira, beiratean biniloak jartzea esaterako".

Aurreztutako diruaz lan gehiago

"Aurreko aldian egin genuen moduan, kiroldegiko erabiltzaileei inkesta bat pasako diegu otsail edo martxo aldera, kiroldegiko beharrak zeintzuk diren jakiteko, eta apirilean hartuko dugu erabakiren bat. Batetik, spinning gela biltegi batean egokitzea izan daiteke aukera bat, orain mini-frontoian egiten delako, eta, bertan aire giroturik ez dagoenez, kexak izan dira. Bestalde, harmailen atzeko gunerako makinak erostea ere aukera bat izan daiteke…".

Muskulazio aparailuak behean

"Gimnasio gelako aparailuak espazio berrira eramatekoak ziren hasiera batean, baina etorkizunean aparailu berriak jarri nahi direnez, beheko gelan mantenduko dituzte oraingoz. 

Taberna, kantxa aldera

Egokitzapen lan horiekin, kiroldegiko barra kantxa aldera jartzea erabaki dute. Hain zuzen ere, bertan lanean daudenek jokoan zer gertatzen den ikus dezaten, eta baita zerbait hartzera doazenek ere bertatik partidua ikusteko.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.