Erakusleiho lehiaketa urtero egin bada ere, aurten garrantzi handiagoa eman nahi dio Eskoriatzako Udalak; izan ere, irailean sortutako Merkataritza Mahaiak bi ekintza antolatu ditu, eta urtea bukatu aurretik egingo ditu. Batetik, Gabonetako erakusleiho lehiaketa, eta bestetik, Eskoriatzako establezimenduak non dauden jakiteko plano bat, Komertzioen mapa izenekoa.
Erakusleiho lehiaketan, sari bakarra izango da, 300 eurokoa, eta Eskoriatzako merkataritzaestablezimendu guztiak aintzat hartuko dira lehiaketan, aurrez izena eman behar izanik gabe. Gutxienez, 2017ko abenduaren 18tik 2018ko urtarrilaren 6ra bitartean (biak barne) erakusketarako prestatuta egon beharko dute erakusleihoek, eta botoa emateko azken eguna urtarrilaren 3a izango da. Bozketa egiten dutenen artean, bestalde, 100 euro zozketatuko dira Eskoriatzako edozein establezimendutan gastatzeko. Sari banaketa eta zozketa, bestalde, urtarrilaren 5ean egingo da, 19:30ean, Fernando Eskoriatza plazan, eta irabazlea aukeratzeko, erakusleihoaren kalitatearekin batera, kontuan hartuko dira publizitate-mezuaren irudimena, originaltasuna eta eraginkortasuna. Berrerabilitako materiala erabiltzea ere baloratuko da. Epaimahaia, berriz, herriko elkarte bakoitzeko kide banak osatuko du. Sariduna aukeratzeko, epaimahaikide bakoitzaren botoak batuko dira, eta horiei herritarren botoak gehituko zaizkie.
Gabonetako egitaraua
Datorren astean, Gabonetako egitaraua etxez etxe banatuko dute, eta, horrekin batera, Komertzioen mapa, turismo mapa, eta erakusleiho lehiaketan herritarrek bozkatzeko txantiloia. Horrekin batera, komertzio txikia sustatzeko herriko merkataritza definitzen duten hainbat hitz agertuko dira.
Urtarrilerako plangintza
Erakusleiho lehiaketa eta Komertzioen mapa ekintzen ostean, urtarrilean elkartuko da berriz Merkataritza Mahaia, eta, bilera horretan, herriko merkataritza indarberritzeko 2018rako plangintza zehaztuko dute. Hala, Udalak erakusleiho lehiaketan parte hartzeko dei egin die herritarrei.