Herriko presoei eta senideei elkartasuna adierazteko jaia

Eskoitzara Egunean, lehen edizioan ateratako talde argazkia. Gartxot Zubizarreta

Iaz ez bazen egin ere, zapatu honetan, hirugarren urtez, herriko presoei eta senideei elkartasuna adierazteko jaia antolatu dute Eskoriatzako Presoen Lagunak taldeko kideek. Hala, egitarau zabala prestatu dute.

Aldarrikapen egunari hasiera emateko, 12:30etan, triki-poteoa izango da Fernando Eskoriatza plazatik hasita. Ondoren, bazkaria Egokiena elkartean izango da. Bazkaltzeko, babajana egongo da, urtero moduan, eta bertaratzeko txartelak hamabi eurotan erosi daitezke Inkernu tabernan.

Mosaiko erraldoia

Bazkalostean, 17:30ean, mosaiko erraldoia egingo dute plazan. Honela adierazi dute Eskoriatzako Presoen Lagunak taldeko kideek: "Herriko plazan Euskal Herriko mapa jarriko dugu bi geziekin. Bertaratzen garenon artean, kartelak erabiliz. Hala ere, ea euririk ez duen egiten… Hala bada, goitik argazkia aterako dugu". Ekintza gauzatzeko, elkartasuna adierazi nahi duen edonori bertaratzeko dei egin diote antolatzaileek. Eguna amaitzeko, berriz, musika izango da nagusi: DJ Makala izango da Inkernun, 23:00etan.

Maixolen inguruko erakusketa

Zapatuko egitarauaz gain, Inkernu tabernan, Reau Sud Francilien preso dagoen Maixol Iparragirre eskoriatzarraren kartzela-ibilbidea adierazten duen erakusketa izango da ikusgai. Iparragirre Espainiarako estradizioaren zain dago, eta hari elkartasuna adierazteko antolatu dute panel informatibo bidezko erakusketa. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.