Askotariko ardoak dastatzeko aukera egongo da zapatuan

Hamaikagarren urtez egingo dute ardo dastaketa Atxorrotx Kultura Elkarteko kideek. Fernando Eskoriatza plazan izango da, 18:30etatik aurrera, eta berrikuntzak izango dira aurtengo edizioan.

Bihar, zapatua, hasiko da, arratsaldeko sei eta erdietan, Pirritx, Porrotx eta Marimototsen ikuskizuna amaitzen denean. Bertan, ardo onduak, kanpoko ardo bereziak, pintxoak eta txistulariek alaitutako erromeria izango dira.

Ardoen antolaketa

Urtero lau ardo-postu jarri izan dituzte antolatzaileek Fernando Eskoriatza plazan, baina aurten, ardoen antolakuntzan berrikuntza bat egongo da: hiru postutan banatuta, bakoitzean lau ardo ezberdin egongo dira, guztiak onduak. Honela azaldu du Juan Luis Zubizarretak, Atxorrotx Kultura Elkarteko lehendakariak: "Hiru multzotan banatuta egongo dira: batean, Euskal Herriko ardoak izango dira, hiru ondu eta zuria eskainiko dute. Beste batean, Espainiako ardoak izango dira, eta han berdin, hiru beltz eta zuria; eta beste postuan, aurten, berezitasuna izango den Kataluniako postua jarriko dugu. Hain zuzen ere, hango ardoak egongo dira, baina bereizgarri batekin: ardo zuri bat, cava bat eta bi ardo beltz egongo dira postu horretan".

Pintxo berezia

Orain dela hiru urte, Pates Zubia enpresak jarritako foie pintxoak arrakastatsuak izan ziren, eta aurtengo edizioan ere izango dira. Bestalde, urteroko txistor-pintxoak ez dira egongo, eta antolatzaileek, sorpresa moduan, pintxo berezi bat jarriko dute, bertaratzen direnendako.

Batzar orokorra

Zapatuko ekintza horretaz gainera, Atxorrotx Kultura Elkarteko kideek urteko batzar orokorra egingo dute, elkartearen gaineko gaiak lantzeko. "Barne kontuez hitz egingo dugu. Inkernu taberna alokatuta dutenei amaitu egiten zaie kontratua, eta zurrumurruak egon dira itxi egingo dela, baina ez da hala izango. Bestalde, batzordeko kideak berritu egingo ditugu… gauza berriak egiteko asmoz".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.