Apotzagan behera ziztu bizian jaisteko asmoz

Gorka Urrutia parte-hartzailea, Apotzagako jaitsieran, aurreko edizio batean. goiena

Apotzaga auzoan behera 91 goitibehera jaitsiko dira bihar jokatuko den lasterketan. Open Norte txapelketarako puntuagarria izango da Eskoriatzako proba, eta Eskoriatzako Goitibehera Zaleak taldeko kideek eginda dituzte egunerako prestaketa-lan guztiak.

Parte-hartzaile batzuek abiaduraren aldeko apustua egingo dute; beste batzuk, aldiz, drift eginaz bihurguneak hobeto hartzen saiatuko dira, baina, lehiatzeaz gain, ondo pasatzera joango dira partaide guztiak. Hala, modalitatetako ezberdinetako ibilgailuak ikusi ahal izango dira: errodamenduak dituen goitibehera bakarra, pneumatika modalitateko 28 goitibehera, gravities modalitateko 11, lomboard 2, patinak 3, eta drift-trike modalitateko 46 goitibehera.

Herritarrak

Iaz, Eskoriatzako azkarrena Gorka Urrutia eta Gorka Jurado bikotea izan zen, 1.33.770 eginda. Aurten, aldiz, ez da bikote bera izango herriko proban; izan ere, Urrutiak Antton Salaberriarekin egingo du proba, eta Juradok ez du parte hartuko. Hala ere, herriko beste hainbat parte-hartzaile ere izango dira. Batzuk, urtero parte hartzen dutenak, eta beste batzuk, lehenengoz egingo dutenak. Esaterako: Ioritz Aranguren eta Aritz Zubia, Lander Mediavilla eta Ekaitz Oñate, Mentxu Castelo eta Yolanda Vita, Miguel Angel Arevalo eta Asun Zubia bikoteak, eta Open Norte txapelketarako lehiatzera joango den bakarra, Edgar Arevalo.
Eskoriatza eta bailarako parte-hartzaileez gain, iaz bezala, Kantabriako, Gaztela eta Leongo eta Asturiasko partaideak ere izango dira aurtengo proban.

Umoretsuenari saria

Maldan behera jaisteko ekimen horrekin hasi zirenetik, urteroko sariak banatu izan dituzte, eta, horiekin batera, goitibehera umoretsu eta dibertigarrienari ere eman izan diote sari berezia. Aurreko edizioetan, antolakuntza taldekoek goitibehera bitxiarekin eta mozorrotuta ere jaitsi izan dute Apotzaga; aurten ere izango da zer ikusi egunerako prestatu dutenarekin. Bestalde, lasterketa egunean, 14:00etatik 20:00etara itxita egongo da Apotzagako errepidea.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.