Gaztelekua zabalik, eskaintza handiarekin

Iratxe Arrese eta Izaskun Besada Eskoriatzako gaztelekuko hezitzaileak.

Irailaren 16an zabaldu zuten Eskoriatzako gaztelekua, eta nerabeek dagoeneko aukera dute aste bukaeretan hara joan eta antolatzen dituzten ekintzekin disfrutatzeko. Hezkidetza, aniztasuna, euskara eta harremanak oinarri izanda, jolasteko eta aisialdirako txoko erosoa sortzen jarraitu nahi dute ikasturte honetan.

Iazko ordutegi bera izango du aurten ere: egubakoitzetan 17:00etatik 20:30era eta zapatuetan eta domeketan 16:30etik 20:30era bitartean. Aurten, gainera, erronka berriak dituzte bertako hezitzaileek. Honela azaldu du Iratxe Arresek, Eskoriatzako gaztelekuko hezitzaileak: "Gazteendako zabalik ditugu ateak, eta lasai etortzeko dei  egin nahi diegu, ez baitago izenik eman beharrik. Bertan, mahai-futbola, ping-ponga, Wii-a, sukaldea, pelikulak ikusteko, musika entzuteko eta lasai egoteko txokoak eta euskarazko mahai joko ugari ditugu. Horrez gain, ekintzak egiten ditugu, tailerrak, irteerak, eta abar. Aurten, orain arte funtzionatu duten ekintza batzuk errepikatu egingo ditugu, eta berriak ere txertatuko ditugu gure plangintzan".

Iraila eta urria prest

Hilabete honetarako eta hurrengorako, sukaldaritza, fimo eta talo tailerrak prestatu dituzte, eta Hi selfie! lehiaketa egingo dute, iaz bezala. Edozelan ere, gazteekin batera antolatuko dituzte ekintza guztiak, betiko moduan.

Urrian ekintza berezi bat egin nahi dute, gainera. Iaz, paintball-a egitera joan ziren, eta aurten ere irteera bat egitea pentsatu dute. "Urriko irteera Aretxabaletakoekin batera egingo dugu, baina ikusi egin beharko dugu gazteek zein proposamen egiten duten. Talo tailerra, berriz, San Migel jaietan Aretxabaletan egingo da…".

Gaba Beltza, berezia

Irailaren 30ean ospatuko dute Gaba Beltza, gaztelekuan, baina aurten berezia egin nahi dute. "Udalarekin eta Tortolis ludotekarekin batera antolatu dugu aurten. Gazteekin su jokoekin elkartuko gara, baina, gazteendako ez ezik, herri guztiarendako zabalduko dugun ekintza izango da".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.