Ikasleei buztingintzara gerturatzeko asmoz, irailaren 21ean, ate irekiak egingo dituzte Fernando Eskoriatza plazan. Hala, 18:00etan, iaz, ikastaroan izan ziren ikasleek beraien lanak eramango dituzte, herritarrek buztingintza ikastaroan zer egiten den ikusteko. Bestalde, ikastaroko Alvaro Garcia irakasleak tornua eramango du gerturatzen diren herritarrei ezagutza batzuk emateko, eta zalantzak dituztenei argibideak emateko. Gainera, gaztetxoenendako buztingintza tailerra ere egongo da.
Bazkide egiteko aukera
Tailerraz gain, Buztinate elkarteko bazkidetza egiteko aukera ere izango da, eta, horretarako, elkarteko hainbat kide izango dira bertan, nahi duenari edozein informazio edo zalantza eskaintzeko asmoz.
Buztinateko bazkide izateko, urtean hamabi euro ordaindu beharko dira, eta horretarako azken eguna irailaren 29a izango da.
Ikasturte berria, urrian
Iaz bezala, buztingintza tailerra haur eta helduentzat egongo da. Hala, ikastaroak eguaztenetan izango dira, haurrak 16:45etik 17:45era egongo dira eta helduak, berriz, 18:00etatik 20:00etara.
Ikastaroan izena eman nahi duenak 626 25 38 77 telefonora deituta edo eskoriatzabuztina@gmail.com helbidera idatzita egin dezake.
