Luis Ezeiza–Herriko Plaza–San Juan kale–Herriko Plaza bidea egingo dute desfilean parte hartuko dutenek, eta erakustaldia edo dantzaldia egiteko 4-5 minutuko tartea izango dute. Parte hartzaile edo kuadrilla bakoitzari zenbaki bat emango diote, desfilerako ordena adierazteko, eta epaimahaia desfilea bukatutakoan elkartuko da erabakia hartzeko.
Arratsaldean, 19:00etan, plazan bertan jakinaraziko da mozorro-desfileko irabazleak nortzuk diren, eta sariak banatuko dituzte orduan. 14 urtetik gorakoentzako bederatzi sari izango dira eta 14 urtetik beherakoentzako, berriz, hiru.
Sari ugari aurtengo lehiaketan
Banakako eta bikotekako irabazleek 50 euro jasoko dute; mozorro onena daramanak, originalenak eta giro onena jartzen duenak. Haien moduan, hiru sari egongo dira hiru eta zazpi laguneko taldekoentzat; kasu horretan, 100 euro jasoko dituzte. Eta, azkenik, zortzi pertsonatik gorako taldeentzat 200 euroko sariak izango dira aurrez aipatutako hiru sailetan. 14 urtetik beherakoen kasuan, bi pertsonatik gorako taldeentzat hiru sari banatuko dituzte.
Paella herri bazkarian
Desfileko parte-hartzaileak plazan biltzean, DJ Moto izango da mu- sika jartzen herritarrak girotzeko, eta, gosea egin ondoren, 14:30ean herri bazkaria izango da frontoian: haragi eta barazki paella eta tarta izango dute, sagardoz lagunduta. Izan ere, ku- pela jarriko dute egun horretarako. Bazkalostean, Imanolek eta Unaik girotuko dute frontoia eta dantza egiteko aukera izango da bertan. 16:30ean, berriz, ze- zentxoak eta poneyak izango dira Luis Ezeizako kantxan, eta arratsaldeko seietan dantzaldia izango da plazan Luhartz taldearekin.
Kukumarroak martitzenean
Inauteri-martitzenean, berriz, umeek urteroko jaialdia egingo dute, 10:30ean hasita, Joseba Iñurrategi pilotalekuan, eta bertan hainbat dantza egingo dituzte Jose Arana eta Luis Ezeiza ikastetxeetako haurrek, urtero moduan.
Arratsaldean, berriz, kukumarroak izango dira, 17:00etan, Herriko Plazan, eta amaitzean, 18:00etan, Andoni Calvo, Josu Rodriguez eta Tirapu DJek alaituko dute plaza gaztetxoendako musika eta dibertsioa jarrita.
