Gabon eguna ekintzaz josita egongo da egun osoan zehar. Goizean, gaztaina erreak jateko aukera izango da Herriko Plazan, eta 12:00etan, Olentzeroren laguntzaileek haurren eskutitzak jasoko dituzte. Ondoren, gabon kantak abestuko dituzte herritarrek, eta 13:00etan, trikiti eskolako ikasleekin kalejira egingo da.
Arratsaldean, berriz, Jose Arana zaharren egoitzan gabon kantak abestuko dituzte herritarrek, eta 18:00etan egingo da Apotzaga auzotik jaitsiko diren Olentzeroren eta Mari Domingiren ongietorria. Haien jaitsierarekin batera, txistulari eta soinu joleekin batera, kalez kale ibiliko dira, eta herritarrek kantuz lagunduko diete. Honako ibilbide hau egingo da: Intxaurtxueta, Gaztañadui, Olazar, Dorleta, Aranburuzabala, Jose Arana eta Herriko Plaza.
Honekin batera, Gabon egunean, herritar guztiak euskal jantzi tradizionalak janztera animatu nahi ditu Eskoriatzako Udalak.
