Trikiti doinuekin kalejiran joan dira inauguratzeko asmoa zuten plazaraino, eta han, lau euskaldun berrik erakutsi dute izena: Euskaldun Berria plaza. Dantzariek ohorezko aurreskua egin diote gero eta Hankamotz taldeko bertsolariek euskarari kantatu. Ixotu gazte taldeko kideek, ostera, plazan egindako marrazkiaren nondik norakoen berri eman dute.
Herritar mordoak egin du bat ekitaldiarekin, besteak beste, Udal ordezkariek, euskaltegiko kideek eta ikastetxeetako neska-mutikoek eta gurasoek. Plazaren izena erakutsi dutenak oso pozik agertu dira: "Izugarrizko ohorea da gurekin akordatu izana, eskerrak eman beharrean gaude", adierazi du Mari Mar Arevalok.
