Egitarau zabala prestatu dute Euskararen Egunerako

Euskararen Eguna ate-joka dago, eta, egun horretarako egitarau zabalaz gain, aurrez ere hainbat ekintza egingo dira Eskoriatzan. Herritar ezberdinek parte hartu dute prestaketa lanetan, eta askotariko jendea batuta antolatu da egitaraua.

Azaroaren 30ean, abenduaren 1ean eta 2an hainbat ekintza egingo dituzte txikienek. Urtero moduan, Tortolis ludotekan jostailu erakusketa eta jolasen txapelketa egingo dute.

Abenduaren 1ean, berriz, Leintz Udal Euskaltegian, Aretxabaletako lokalean, Mintzodromoa egingo da, ele bitan, 09:30ean. Eskoriatza eta Aretxabaletako euskaltegietako ikasleak, Berbalagunak, Auzoko taldekoak eta nahi duten herritarrak daude gonbidatuta.

Abenduaren 2an, berriz, Eskoriatzako Herriko Plaza apainduko dute, 10:00etan hasita, eta 19:00etan kantu kalejira egingo dute Aretxabaletako Kantu Poteo taldearekin batera.

Euskaldun Berrien plaza

Euskararen Egunari dagokionez, Euskaldun Berrien plaza inauguratuko dute –Egokiena elkarte ondoko plazan–; Udalak iaz osoko bilkura batean onartu zuen euskaldun berriek euskara ikasteko egindako ahaleginaren aitortzan herriko txoko horri izen hori ematea. Ekitaldi instituzionala izango da, baina inaugurazio eguna baino lehen, gaur, Ixotu Euskara Taldekoek murala margotuko dute.

Denek parte hartzeko ginkana

Abenduaren 3ko lehen ekintza ginkana izango da, Herriko Plazan jarriko den karpan egingo dena. Ekintza berria da eta ume, nagusi, heldu… denentzako antolatu dute. Jolasa 11:30ean hasiko da, eta, herriko hainbat lekutan piezak bilatuz, parte hartzaile guztien artean puzzle bat osatuko da.

Bazkaria Herriko Plazan

 

Abenduaren 3ko egitaraua

• 11:30 Ginkana plazan.
• 13:15 Euskaldun Berrien plazaren inaugurazioa.
• 14:30 Herri bazkaria plazako karpan. Paella, kafea eta pastela. Baskalostean: Imanol eta Unai (Eskoriatza) dantzaldia.
• 17:00 Huhezikoen Karaokea Zaldibar antzokian.
• 18:00 Hi, Selfie Gaztelekuan.
• 18:30 Freshcool dantza ikuskizuna eta Tio Teronen semeak. Ondoren: Dantza jauziak.
• 22:30 Kontzertuak: Akerbeltz eta Jasan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.