Izarok kontzertua eskainiko du Inkernun

Imanol Beloki Unamuno 2016ko urr. 20a, 10:02

Izaro kontzertuan.

Izaro Andres Zelaieta mallabitar musikari gazteak Inkernu tabernan kontzertua eskainiko du bihar, egubakoitza, 23:00etan. Atxorrotx Kultur Elkarteak antolatutako emanaldian, folk estatubatuarrez bustitako pop doinuak entzuteko aukera izango da. Ahots fin eta pertsonala ekarriko du oholtza gainera, gitarraren soinuarekin lagunduta, eta baita Lauroba taldeko musikarien laguntzaz.

Om izeneko bere lehen diskoko hamahiru kantuz osatutako bilduma ekarriko du Eskoriatzara. Euskaraz, gazteleraz eta ingelesez abestutako errepertorioan, hainbat kantu eder daude. Paradise da horietako bat. Kantu hori Ben Sharrock eskoziarraren Pikadero filmaren soinu bandan erabili zen, Donostiako Zinemaldian aurkeztu zena. Bestalde, Youtuben ia 41.000 ikustaldi izan ditu abestiak, eta, kantu horretaz gain, Honey kantuak ere bere arrakasta izan du, Gaztea irratiko zerrendetan izan da eta.