Zapatuan, 18:00etan emango diete hasiera Madalenei etxafuegoak jaurtiz, eta ondoren, festa kanpaia izango da, Arientzako kanpai-jotzaile eskolakoen eskutik. Alberto Letona Maringo auzo-alkatearen esanetan: "Urte dezente daramagu jaiak mantentzen eta egitarau xumea prestatzen dugun arren, bertaratzen garenok oso ondo pasatzen dugu. Hala, auzotarrak soilik izan arren, nahi duena etorri daiteke bertara".
Bestalde, Gatzagako auto igoera dela-eta, 16:00etatik 20:00etara bitartean itxita egongo da errepidea; beraz, lehenago batuko dira auzotarrak. 21:00etan, berriz, auzo-afaria egingo dute Lexarrape elkartean, eta 35 lagun inguru batuko dira bertan. Eta, zapatuarekin amaitzeko erromeria egingo dute urteroko gonbidatuekin.
Afalostean, erromeria
Jainaga eta Narbaiza trikitilariek girotuko dute gaua afaldu ostean. Hala, dantzarako tartea izango da elizapean.
Domekan, berriz, meza eta luntxa egingo dute. Aurten, meza 12:00etan beharrean 11:00etan izango da apaizak eskatuta.